¿                                         

                                         Ondi jueron los tiempos aquellos, que pue que no güelvan, ... (J.M. Gabriel y Galán).

Página Presonal De Manuel Ramos Susañu(o). Jecha al Altu Estremeñu por J. M. Alcón Olivera (pa vel el su perfil  "pinchi" aqui).

EMPORTANTI: La pritensión  de esta página web no es otra que la de jadel que se conoza (y compartil) de un möu amenu y sencillu, con alguinu de historia  y jografía, las veriguacionis jechas respectiblis al apellíu Susañu(o) (un ramal) de Peralis del Puertu (Cázris, Alta Extremaúra) pa po si son de alguna utiliá pa los que lo llevin en general puestu que el significáu del mesmu debi de valel pa tos los asín apelliáus. Esti, al sel tan pelegrinu, produci curiosiá y extrañeza.

SUSANU(O): El adjetivu castellanu Susanu(o) (tamién ena lengua portuguesa) tieni su emprecipiu en Suso (polcima) a la pal que del deriváu del Latín Sursum (polcima) o Sussum (de polcima). El sufiju castellanu anu(o)/a forma adjetivus que indican procedencia, pertenencia o adscripción (dambas sigún la RAE). La raigambri Sus ajuntá al sufiju anu(o) jorman el adjetivu-topónimo-apellíu Susanu(o) y quedría idil POLCIMA O DE POLCiMA.

En tiempus pasáus, Portugal y el Estáu Español juerun andi el apellíu y el topónimo  SUSANU(O) abondecía. Actualmenti ha síu posibli el localidalu (el apellíu) en el Estáu Español, portándulu (Españolis y Portuguesis) jasta las propias colonias.

SUSAÑU(O): Lo emportanti es el sabel o dalsi de cuenta (acalugal) pol mé los datus disponiblis del porqué de la existencia de SUSAÑU(O).

Vistu la pertenencia histórica del láu occidental Extremeñu al Reinu de Lión, pía habel síu que SUSAÑU(O) hubía habel llegáu (arriváu) a esta zona (Sierra de Gata) de influyencia Lionesa (alegu Castellanu-Lionesa de continu dece la unión de 1230 con Fernandu III de Castilla) a través de las tierras de esti Reinu (Lión) de antoncis, en algotras épocas destintas y pol vialis diferentis (repoblacionis Cristianas, andilis ganaérus, etc.), en möu de apellíu o topónimu.

Los topónimus juerun usáus pa identifical endividúus (o grupus) que medianti estus pían sel reconocíus por su lugal de procedencia o asiajación. Hasta que estus volucionarun en apellíus juerun una seña pa diferencial a las presonas y SUSANU(O) es unu de ellus.

El jechu de la su presencia Americana del apellíu se pía debel a la emigración de algún(us) portaor(is) en épocas colonialis Españolas.

SUSAÑU(O) EN PERALIS DEL PUERTU: El únicu núcleu enjalláu del antismentáu apellíu SUSAÑU(O) en el Estáu Español, se encuentra localidáu en el Noroesti de Extremáura, anque se le pue jallal mu aisláu en diversus puntus jográficus Peninsularis comu el País Vascu ena mayol medía, o Cataluña (consecuencia de las migracionis del sigru XX), relacionáu conas localidadis que ara se mientan, ena comarca de Sierra de Gata, zona Extremeña de antigua influyencia lingüistica Astur-Lionesa, actualmenti Altu Extremeñu, concretamenti enas localidadis de Peralis del Puertu y Villasbuenas de Gata, siendu lógicu que, por estal a la vera un pueblu del otru, el portaol originariu sea el mesmu pa dambus casus.

Peralis del Puertu es el primel pueblu Extremeñu que actualmenti mos topamus al trascolal el Puertu de Peralis, unu de los pasilis naturalis y obligáus dece Castilla-Lión hacia tierras Extremeñas por la parti más occidental. El núcleu primariu (emprecipiu del futuru Peralis del Puertu) estaría asiajáu "an pie" de la vía pecuaria, una de los muchus andilis ganaérus de la trajumancia entre Lión, Castilla y Extremáura dece la Edad Media, ruta que una vez salvá la Sierra de Gata seguía hasta el Sudoesti de la actual provincia de Cáziris, po lo que más normal es afiguralsi que SUSAÑU (O), ya en móu de apellíu o topónimu, llegó al lugal en tiempus y épocas desconocías de la mentá trajumancia o repoblación Cristiana.

Estou segnifica y jadi suponel que el asentamientu humanu llamáu Peralis del Puertu es relativamenti "jovin", de la época Cristiana Castellana (¿paí pal añu 1300?) y sus primerus miembrus pían sel de origin Castellanu-Lionés, comu asín lo atestiguan la gran mayoría de los apellíus localis. En Peralis del Puertu el apellíu SUSAÑU(O) está ya presenti (espetáu), de acordi cona documentación de la Ilesia, a mediáus del sigru XVII.. Esti datu fertifica la presta ubicación o presencia local de esti, siendu de los "viejus" del lugal.

Esta ubicación o presencia pía sencillamenti remontalsi al prencipiu de la formación de la localidá o una fecha cercana a esta.

TRAJUMANCIA: Fenómenu ganaéru, prencipalmenti arreferíu al ovinu, que con seguriá se dio ena Península Ibérica dece tiempus inmemorialis, consistenti en el trasladu del ganáu de un lugal a otru sígún la estación del añu. En Otoñu-Invielnu aprovechaban los pastus del Sur y en Primavera-Veranu los del Norti. La época de la trajumancia conocía emprecipia a dalse al mesmu tiempu que la llamá Reconquista (ena realidá simpli expansión territorial de varius Reinus Peninsularis), siendu el  Rey Castellanu-Lionés Alfonsu X el Sabiu quien en 1273 unificó toas las mestas en una sola a la que se le dio el nombri de “El jonráu conceju de la mesta” al que concedió grandis prevendas, prevendas que llevarun a un continúu enfrontilamientu conos agricultoris por cuyas tierras transcurría la errefería trajumancia por mé una infinita redi de andalis ganaèrus. la Mesta fue suprimía en 1836.